எண்ணங்கள் பலவிதம்

என் எண்ணங்களின் நீருற்று


5 பின்னூட்டங்கள்

பேய், பூதம்,பூச்சாண்டி

படம்
இல்லாததை இருப்பதாக நினைத்து கற்பனை செய்வதும் ஒரு சுகம் தான்! அப்படி இல்லாத ஒன்று தான் பேய்!! இந்த பேய், பூச்சாண்டி எல்லாம் நாம் சிறு வயதில் இருந்தே பிறர் சொல்ல கேட்டும், புத்தகத்தில் படித்தும் அதற்கு ஒரு கற்பனை வடிவமும் குடுத்து உலாவ விட்டிருக்கிரோம்.. எப்போது இருந்து பேய் பற்றிய ஆராய்ச்சியில் இறங்கினேன் என்று சரியாக நினைவில்லை. வீட்டை விட்டு சாயுங்காலம் விளையாட போகும் முன்னர், அம்மா எச்சரிக்கை செய்வார்களே, இருட்டுரதுக்கு முன்னாடி வந்துடு, இல்லை என்றால் பூச்சாண்டி பிடித்து கொண்டு போய் விடுவான்!! யார் இந்த பூச்சாண்டி, என்ன பெயர் இது? பூ வெச்சிருப்பானா?? முதல் பயம் மனதினுள் முளை விடும்.

படம்
அடுத்ததாக சாப்பிட வைப்பதற்காக சொல்லப்படும் கதைகளில் கண்டிப்பாக ஏதாவது ஒரு பூதம்(அதற்கு ஆயிரம் தலை இருக்கும்), இல்லை ஒரு சூனியகாரி(அவளுக்கு பற்கள் நீண்டு, நகங்கள் கூர்மையாக இருக்கும்), இல்லை ஒரு ஒற்றை கண் அரக்கனாவது இருப்பான்! அதை கதையில் வரும் ஹீரோ எப்படியாவது ஏழு கடல் தாண்டி, ஏழு மலை தாண்டி ஒரு பூவை இல்லை ஒரு நாகம் காத்த வைரக்கல்லை திருடி, இப்படி ஏதாவது ஒன்றை கஷ்டப்பட்டு கொண்டு வந்து இந்த பூதத்தை அழிக்க வேண்டும்! அப்போ என்னோட பிஞ்சு மனதில் சின்னதா ஒரு டவுட் வராமல் இல்லை! ஏற்கனவே யாரோ ஒரு தீயவர் இறந்து போய் தான் பூதம் ஆகி இருக்கிரார்! அதை எதுக்கு திரும்ப அழிக்கனும் என்று புத்தி ,கூர்மையோடு யோசித்தாலும் கேள்வி கேட்க தோன்றவில்லை! கதையில் என்ன நடந்தா என்ன, திரில்லிங்கா இருக்கில்ல!!

படம்
கிட்டதட்ட சிறு வயதில் எல்லா மரங்களின் மீதும் ஏறிய அனுபவம் உண்டு! ஆனால் புளிய மரம் பக்கத்தில் மட்டும் உச்சி வெயில் பொழுது போவது கிடையாது! ஏனென்றால் அந்த சமயம், பேய் உச்சாணி கொம்பில் பசியோடு உட்கார்ந்திருக்குமாம்!! யாராவது நிமிர்ந்து பார்த்தார்கள் ஒரே அடியா அடித்து சாய்த்து விடும் என்று சொல்ல கேட்டிருக்கிரேன்! நானும் அந்த பயத்தில், புளிய மரத்தை தாண்டி செல்லும் போது மட்டும் குனிந்த தலை நிமிராமல், நெஞ்சு தடதடக்க ஒடியே வந்து விடுவேன்!! இன்னொரு கதையும் உண்டு, மதிய நேரம் தோட்டத்து பக்கம் யாரேனும், கறி குழம்பு, மீன் குழம்பு என்று அசைவ வகைகளை தனியாக கொண்டு சென்றால், பின்னாடியே பேய் பேசி கொண்டே வருமாம், ‘ஏய் எனக்கு கொஞ்சம் தாயேன்?’ என்று!
இப்படி வகை வகையாய் கூட படிக்கும் பிள்ளைகள் கூறிய கதைகளால், பேய்கள் மனதினுள் நீக்கமர நிறைந்து இருக்கின்றது! சரியாக சொல்ல வேண்டும் என்றால், நம் மனதிற்கு நாமே குடுக்கும் ஒரு திரில்!

படம்

இப்படியாக, பேய் படங்களின் மீது கவனம் திரும்பியது! முதன் முதலில் விவரமறிந்து பார்த்தது ‘பதிமூன்றாம் நம்பர் வீடு’. அதை பார்த்ததிலிருந்து 13 நும்பர் மேல் ஒரு வெறுப்பு உண்டாயிற்று என்றால், அதில் ஆச்சரிய பட ஒன்றுமே இல்லை! என் தங்கை எனக்கும் மேல் த்ரில் விரும்பி! அந்த படத்தில் பேய் நிற்கிறது என்பதை மெய்பிக்க, கண்ணாடி முன் நிற்பவரின் பிம்பம் தெரியாது, புகை கிளம்புவதை காண்பிப்பார்கள்!! அதை பார்த்ததில் இருந்து, அவள் கண்ணாடி இருக்கும் அறைகளில் உறங்குவதையே விட்டு விட்டாள்!!
கொஞ்சம் வளர்ந்த பின்னர், தோழிகள் கூட்டாக சேர்ந்து ‘Evil Dead’ போன்ற பேய் படங்கள் பார்த்ததுண்டு!! அதில் பாதி பேர் பயந்தாங்கொள்ளிகளாக இருப்பர்! பேய் வருகின்ற ஓசை கேட்ட உடனே கண்ணை மூடி கொள்வார்கள்! பேய் வருகின்ற சீன் முடிந்து விட்டதா என்று கேட்டு விட்டே கண்களை திறப்பார்கள்! நான் ஒரு படி மேல் சென்று காதையும் பொத்தி கொள்வேன்!! இப்படி ஒருவாராக, பேயை காணாமலே பேய் படம் பார்த்து முடித்து விடுவோம்!! இந்த லட்சணத்தில் அந்த படத்தை இதுவரை பார்க்காதவர்களிடம், பெருமை வேறு அடித்து கொள்வோம்!!

படம்

படம்
சில காலங்களுக்கு பிறகு, இந்த கேபிள் டீவீ எல்லாம் வந்து சேர்ந்த பின்னர், HBO சேனலில், வியாழக்கிழமை தோறும் பேய் படங்கள் போடுவார்கள்! அதை ஆர்வத்தோடு பார்த்ததுண்டு! அதில் ‘The Ring’ என்ற படத்தை பார்த்து நிஜமாகவே பயந்தும் போனதுண்டு! நல்ல வேளை அன்று என் உடன்பிறந்த தம்பியும் அருகில் இருந்ததால் தப்பித்தேன்! நான் பார்த்த பேய் படங்களில், அது நிஜமாகவே பயங்கரமானது! அந்த படத்தில் ஒரு பேய், டீவீயிலிருந்து இறங்கி வருவது போல் காட்சி அமைத்திருப்பார்கள்!! படம் முடிந்த பின்னரும், பயம் தெளியாமல், நீ டீவீயை அணைத்து விடு, நான் டீவீயை ஆஃப் பண்ண மாட்டேன் என்று நெடு நேரம் சண்டை போட்டோம்!! சிறிது நாளைக்கு டீவீயை பார்த்தாலே பயமாக இருந்தது!! ரொம்பவும் ரசித்த இன்னொரு பேய் படம் ManojNiteShyamalanனின் ‘The Sixth Sense’. அது போக, மலையாள படமான ‘மணிசித்ர தாள்’ மிகவும் ரசித்த ஒன்று!

படம்

இப்படியாக வளர்ந்து, திருமணம் முடிந்து குழந்தைகள் வந்து விட்ட பின்னர், இந்த பேய் பட மோகங்கள் அறவே இல்லாமல் போயிற்று!! கிட்டதட்ட நிறைய வருடங்கள் ஓடி விட்டது ஒரு அருமையான பேய் படத்தை ரசித்து!! என் நீண்ட நாள் ஆசையான , ஒரு த்ரில்லிங்கான பேய் படத்தை கண்டிப்பாக இன்று  பார்த்து விடுவேன் என்று நினைக்கிரேன்!! பார்க்கலாம் ”The Conjuring’ Movie எப்படி இருக்கும் என்று!! ரசித்து விட்டு சொல்கிறேன்……..


4 பின்னூட்டங்கள்

மிஸ் யூ …..

படம்

நம்ம வாழ்க்கையில், ஒருத்தர் நம்ம கூடவே இருக்கிர வரையில்,

அவர்களுடைய அருமை நமக்கு

தெரியாது! அவர்கள் தூர விலகி சென்ற பின்னர் தான், அவர்களுடைய

நியாபகங்கள் நம்மை துரத்தி துரத்தி வரும். இந்த பதிவு கூட, நான் ரொம்பவே

மிஸ் செய்யர ஒருத்தர பத்தி தான்! சின்ன வயசில், எனக்கு அவர அவ்வளவா

பிடித்ததில்லை! அவரை நேரில் கண்டாலே, ஒட்டம் பிடித்து விட்டு தான் மறு

வேலை, இல்லையேல் அழ அழ வைத்து விடுவார்! ஆனால் இவர் இல்லாம

நான் இல்லை என்ற நிலைமை ஒரு கால கட்டத்தில் வரும் என்று கனவில்

கூட நினைத்ததில்லை!

அவர் இப்போ எங்க கண்ணில் பட்டாலும், முதல் ஆளாய் அழைத்து வருவது

நான் தான்! இவ்ளோ ஸ்பெசலானவர், வேற யாரும் இல்ல.. நம்ம

Mr.சின்னவெங்காயம் அவர்கள் தான்!!

இவர் நம் தமிழ் நாட்டின் செல்ல பிள்ளை! தமிழ் நாட்டை

தாண்டி, எந்த ஊர் சென்றாலும், முதலில் தேடுவது இவரை தான்! தமிழர்,

மலையாளீ, இவர்களை தவிர, வேறு மாநிலத்தவர் எவருக்கும், இதன்

அருமை தெரியவில்லை! பெரிய வெங்காயமே, அவர்களுடைய விருப்பம்!

இதை எப்போ உரிச்சி, எப்போ வேலையை முடிக்க, என்று எரிச்சலை

வெளிப்படுத்துவார்கள்!

உண்மைதான், அதை தோலை உரித்து, வெட்டுவது,

என்பது அவர்கள் சொல்வது போல பெரிய வேலை தான், ஆனால், அவற்றின்

நற்குணங்களை அறிந்தோர் குறை சொல்ல மாட்டார்கள்!

இப்போ வெங்காயம் வெட்டுவதற்கு என்று நிறைய கருவிகள் வந்து விட்டன,

இதே மாதிரி, வெங்காய தோலை உரிப்பதற்க்கும், ஏதாவது கண்டுபிடித்தால்

நன்றாக இருக்குமே, என்று நானே பல முறை யோசித்ததுண்டு!  நான்

சமையல் செய்ய படித்த புதிதில் இருந்து இன்று வரை, அழாமல் வெட்டியதே

இல்லை! நமக்கு ரொம்ப பிடிச்சவங்க, சில நேரம் காரணமே இல்லாமல் அழ

வைப்பர்கள், அது மாதிரி தான் இதுவும் என்று மனதை தேத்தி கொள்வேன்!

எனக்கு கல்யாணம் முடிந்து, புகுந்த வீடு சென்ற புதிதில், என்

அத்தைஎன்னை, வெங்காயம் வெட்டவே விட மாட்டார்… அவருக்கு பயம்,

நான் அழுது, அழுது வெட்டுவதை பார்த்து, என்ன புது பெண், வந்து கொஞ்ச

நாள் கூட ஆக வில்லை, இப்படி அழுதே  என்று யாரும் சொல்லி

விடுவார்களோ என்று!! எவ்வளவு அழுகை வந்தால் என்ன, எனக்கு எந்த

குழம்பு, எந்த கூட்டு வைத்தாலும், கை நிறைய வெட்டி போட்டால் தான்

திருப்தியாக இருக்கும்!

என் பசங்க இருவரும், நான் சிறு வயதில் செய்தது போலவே,

வெங்காயத்தை, தனியாக எடுத்து தட்டின் ஒரமாக வைத்து விடுவர்!

அதனால் நான், வெங்காயம் போட்டதே தெரியாமல், குழம்பு

வைத்து, அவர்களை சாப்பிட வைத்து விடுவேன்! சும்மாவா, சின்ன

வெங்காயம், உடம்புக்கு குளிர்ச்சியை தரும், நம் ரத்தத்தை சுத்திகரிக்கும்

ஆற்றல் கொண்டது! மெட்ராஸ் ஐ, போன்ற கண் நோய், வரும் சமயங்களில்

எல்லாம், இந்த வெங்காயத்தை, வீட்டினுள், ஆங்காங்கே உரித்து

வைத்து விட்டால், ஒருத்தரிடம் இருந்து, இன்னொருவருக்கு பரவாது.. மிக

சிறந்த கிருமி நாசினி! காலில் முள் குத்தி வலி எடுப்பவர் கூட, இந்த சின்ன

வெங்காயத்தை நன்கு வதக்கி, ஒரு துணியில் வைத்து கட்டி விட்டால், முள்

தானாக சிறிது நேரத்தில் வெளியில் வந்து விடும்.. இப்படி நிறைய

பாட்டி வைத்தியங்கள் சொல்லிட்டே போகலாம்!

சரி, சரி நம்ம விஷயத்துக்கு வருவோம், இப்போ நாங்க இருக்கிர

குண்டூரில் சின்ன வெங்காயம் இல்லை! கல்யாண சீசன் சமயங்களில்

மட்டுமே விற்பனை செய்ய படுமாம்! விசேஷங்களின் போது, சாம்பாரில் இந்த

சின்னவெங்காயத்தை போடுவார்களாம்! இப்பெல்லாம், எவ்வளவு

கவனமாக சமையல் செய்தாலும், ஏதோ ஒன்றின் சுவை குறைந்தது

போலவே இருக்கிரது! நிஜமாவே, ரொம்ப மிஸ் செய்யரேன், Mr.சின்ன

வெங்காயம், மிளகாய் குழம்பு, வெந்தய குழம்பு, மீன் குழம்பு எதுவுமே, நீங்க

இல்லாமல் ருசிக்கவே இல்ல! அய்யோ, நம்ம ஊரு சின்னவெங்காய

பக்கோடா, எல்லாம் கண்ணுக்குள்ளேயே இருக்குது, போதும் இதுக்கு மேல

யோசிச்சா அழுகை வந்து விடும்! சின்ன வெங்காயம், உரிக்க, உரிக்க உள்

ள ஒன்னுமே இல்ல தான், ஆனால் என் உள்மனசுல, அதுக்கு நிறையவே

இடம் இருக்கு!!!!!!!


5 பின்னூட்டங்கள்

இனிப்பு மீன் குழம்பு

     தலைப்பை பார்த்து பயந்துவிட வேண்டாம், இது ஒன்றும் இந்த குழம்பை எப்படி வைப்பது என்று விளக்கும் உரை அல்ல! மீன் குழம்பு வைப்பது என்ன சீம வித்தையா, என் கடை குட்டி பையனை சமாளிப்பது  தான் எனக்கு சீம வித்தை!  அதுவும் விடுமுறை நாட்களில் கேட்கவே வேண்டாம், என்னை ஒரு வழி பண்ணிடுவான்! எந்த வேலை வீட்டில் நடந்தாலும், நடக்காவிட்டாலும், சமையலை முடித்துதானே ஆக வேண்டும்! அவனை சமாளிபதட்காகவே சமயலறையில் சிலவற்றை  வைத்திருப்பதுண்டு!  அவற்றில் முதன்மையானது அல்பன்லீபே லாலிபாப்! அதை கையில் கொடுத்தால் ஒரு அரைமணி நேரம் சில வேலைகளை முடித்து விடலாம்! சில நேரங்களில், அந்த லாலிபாப் அவன் கைகளை விட்டு நழுவி கீழே விழுந்து உடைந்து இரண்டாக பிளந்து விடும்! வீல் என்ற சப்தத்துடன் பைய்யன் ஓடி வருவான், ‘அம்மா இதை ஒட்டி தாருங்கள்’!!!  ஒருவாறு அவனுடைய அழுகையை நிறுத்தி, அவனை  சமாளிபதட்காகவே வைத்திருக்கும் இரண்டாவது யுத்தியான கல்கண்டை தருவேன், அதுவும் ஒரு கிண்ணம் நிறைய! கல்கண்டை பார்த்து மயங்காத பிள்ளைகளும் உண்டா என்ன!  ஒரு ஸ்பூனையும் , இன்னொரு கிண்ணத்தையும் எடுத்து கொண்டு விளையாட ஆரம்பித்து விடுவான்!  நானும் அந்த நேரத்தில் ஒருவாறு மீன் குழம்பை வைத்து முடித்து, சாப்பாடு மேசையில் கொண்டு போய் வைத்தேன்! அவன் கல்கண்டை ஒரு கிண்ணத்தில் இருந்து இன்னொரு கிண்ணத்துக்கு மாற்றி, ஸ்பூனால் கிண்டியும் விளையாடி கொண்டிருந்தான்!  அப்பஅப்ப அம்மா அம்மா என்று அழைத்து கொண்டே இருப்பான், நானும் ஒவ்வொரு தடவையும் என்னம்மா என்று பதில் கூறினால் தான் திருப்தி அடைவான்! ஒருவாறு வேலையை  கிட்டதட்ட முடித்து விட்டு , சிதறி கிடக்கும் கல்கண்டை அள்ள சென்றேன்! எப்பொழுதும் சிதறிய கல்கண்டுகள் பாதத்தை பதம் பார்க்கும் , ஆனால்  வழக்கத்துக்கு மாறாக ஒன்று இரண்டை தவிர , கல்கண்டுகள் தட்டு படவே இல்லை! பைய்யன் சாப்பிட்டு விட்டான் போல! பிறகு அவனை சாப்பிட வைத்து தூங்கவும் வைத்தேன். வெளியே சென்றிருந்த என் கணவரும், வீடு வந்து சேர்ந்தார்! நான் அவருக்கு  சாப்பாட்டை பரிமாறி விட்டு பக்கத்தில் அமர்ந்தேன்! என்னை ஒரு முறை முறைத்தவாரே சாப்பிட்டு முடித்தார்! எனக்கு ஒரு பழக்கம், எப்போ எதை சமைத்தாலும் , நன்றாக இருக்கிறதா என்று டேஸ்டு பார்க்கவே மாட்டேன், அவ்வளவு நம்பிக்கை , நான் செய்யும் சமையலின் மேல்! இன்னிக்கு என்ன ஆச்சு, என்று நினைத்தவாறே சாப்பிட அமர்ந்தேன், ஒரு வாய் சோற்றை வாயில் வைத்தவுடன் தான் புரிந்தது, பைய்யன் தன் கைவரிசையை காட்டி இருந்தான், மீன் புளிகுழம்பு கல்கண்டு புளிகுழம்பு ஆக மாறி இருந்தது!!!!!!!!!